Doktor esqer hémit kanada Uyghur akadémiyesining yene bir nöwetlik re'isi bolup saylandi

Igilishimizche, her qaysi döletlerdiki Uyghur ziyaliylirini öz ara jem qilip ilim we pikir almashturush, eqil ambiri shekillendürüp, milletning kelgüsi üchün xizmet qilish meqsitide qurulghan Uyghur akadémiyesi we uning shöbiliri Uyghurlarning siyasiy kirizisi éghirlashqan 7 yildin buyan özining pa'aliyetlirini künsayin janlandurup kelmekte. Uyghur akadémiyesi bir tereptin, dunya ilim sahesidikilerge Uyghurlarni tonutush we zulumni anglitish üchün tirishsa؛ yene bir tereptin, Uyghur xelqige bilim arqiliq yol körsitish, chare izdesh, öz rolini téximu yaxshi jari qildurush üchün tirishmaqta.

Uyghur akadémiyesi torining élan qilishiche, 21-noyabir küni Uyghur akadémiyesining kanada shöbisi, yeni kanada Uyghur akadémiyesi qurulghinigha üch yil bolghan bolup, hey'et ezaliri nizamname telipi boyiche saylam ötküzüp, doktor esqer hémitni qaytidin re'islikke saylap chiqqan.

RFA/Erkin Tarim

Démokratik we adil usulda élip bérilghan saylamda köp sanliq awaz bilen kanada kalgari uniwérsitétining biyologiye tetqiqatchisi, doktor esqer hémit ependi kanada Uyghur akadémiyesining yene bir nöwetlik re'isi bolup saylan'ghan. Akadémiye nizamnamisigha asasen her qaysi döletlerdiki tarmaq akadémiye re'isliri eng köp bolghanda uda ikki nöwet re'is bolalaydiken.

Kanada Uyghur akadémiyesining mezkur saylimigha Uyghur akadémiyesining re'isi rishat abbas, akadémiye bash teptishi doxtur memet imin ependilermu közetküchi süpitide qatnashqan.

Uyghur akadémiyesining tör bétidiki xewerde éytilishiche, kanada Uyghur akadémiyesi doktor esqer himit bashchiliqida 7 kishilik da'imiy hey'et komitétining teshkillinishi bilen 2021-yili 24-séntebirde torontoda qurulghan we resmiy royxetke élin'ghan. Bu ilmiy teshkilat kanadadiki Uyghur ziyaliylarning öz'ara hemkarliqini kücheytishke türtke bolush, ilim-meripet arqiliq Uyghur rohini janlandurush, weten-millet kürishige ilmiy jehettin maslishish meqsitide qurulghaniken.

Doktor esqer himit ependi ziyaritimizni qobul qilip, bu qétimqi saylamdiki tesirati we köngül sözlirini ortaqlashti.

U kanada Uyghur akadémiyesining ötken üch yil ichide qilghan xizmetlirining nuqtiliq halda Uyghur milliy kimlikini qoghdash, irqiy qirghinchiliqni anglitishqa merkezleshkenlikini otturigha qoydi.

Kanada Uyghur ziyaliyliri we ixtisas igiliri köp olturaqlashqan dölet. Doktor esqer hémit ependi kanada Uyghur akadémiyesining bundin kéyin nuqtiliq halda qilidighan xizmetliri toghrisida toxtaldi.

Uyghur akadémiyesining bash teptishi doxtur memet imin ependi, Uyghur akadémiyesining aldinqi üch yilliq xizmetlirige, bolupmu kanadada ana tilni qoghdashqa da'ir qiliwatqan xizmetliridiki netijilirige yuqiri baha berdi, shundaqla kéyinki üch yilliq xizmetlirige téximu chong netijilerni tilidi.

Uyghur akadémiyesi torining melumatigha qarighanda, kanada Uyghur akadémiyesidin bashqa yene yawropa, awstraliye, amérika, ottura asiya we yaponiye qatarliq dölet hem rayonlarda Uyghur akadémiyeliri qurulghanliqi melum.