Amérika Uyghur akadémiyesining 3-nöwetlik saylimida aldinqi xizmetler xulasilinip yéngi pilanlar otturigha qoyuldi

Muxbirimiz méhriban
2022.06.24
Share on WhatsApp
Share on WhatsApp
Amérika Uyghur akadémiyesining 3-nöwetlik saylimida aldinqi xizmetler xulasilinip yéngi pilanlar otturigha qoyuldi Amérika Uyghur akadémiyisi kolumbi'a uniwérsitétida ötküzgen “Uyghurlarning nöwettiki kimlik krizisi” témisidiki yighinda xatire süret. 2019-Yili 12-mart, nyu york.
Photo: RFA

“Amérika Uyghur akadémiyesi” din igilishimizche, 16-iyun küni “Amérika Uyghur akadimiyesi” hey'et ezaliri yighin échip, 3-nöwetlik saylam ötküzgen.

“Amérika Uyghur akadémiyesi” hey'et ezaliridin xarward uniwérsitéti sherqiy asiya til we medeniyet bölümining oqutquchisi gülnar eziz xanim radiyomiz ziyaritini qobul qilip, bu qétimqi saylam heqqide melumat berdi.

Gülnar eziz xanimning bildürüshiche, “Amérika Uyghur akadémiyesi” ning 3-nöwetlik re'islikige, aldinqi nöwetlik re'islik wezipisini ötep kéliwatqan doktor abliz abduqadir ependi qayta saylan'ghan.

Amérika Uyghur akadémiyesi” ning yéngi nöwetlik re'isi méditsina tetqiqatchisi doktor abliz abduqadir ependimu ziyaritimizni qobul qildi.

Doktor abliz abduqadir ependining bildürüshiche, uning bu qétim 3-nöwetlik re'islik wezipisini üstige élishigha, uning Uyghurlar béshigha éghir külpetler kelgen nöwettiki weziyette, bir Uyghur ziyaliysi qilishqa tégishlik burchini ada qilish iradisi seweb bolghaniken.

Melum bolushiche 3-nöwetlik saylam yighinida, doktor abliz abduqadir ependi aldinqi ikki yilda élip bérilghan xizmetler heqqide xulase doklati bergen we kéyinki ikki yilliq xizmet pilanini otturigha qoyghaniken.

Doktor abliz abduqadir ependi ziyaritimiz jeryanida “Amérika Uyghur akadémiyesi” ning aldinqi ikki yilliq xizmetliri heqqide toxtilip, özlirining aldinqi ikki yilliq xizmitide, amérikadiki dangliq uniwérsitétlarda mexsus léksiyeler uyushturush, tutqundiki Uyghur ziyaliyliri heqqide matériyallar teyyarlap, ularning ehwalini anglitish, londonda échilghan “Uyghur soti” ning guwahliq matériyallirini terjime qilip teyyarlash qatarliq ishlarni qilghanliqini bildürdi. U yene “Amérika Uyghur akadémiyesi” diki ezalarning bu xizmetlerni özining ishtin sirtqi waqitlirini we zéhnini qurban qilip aktip ishligenlikini eskertti.

Uning bildürüshiche, “Amérika Uyghur akadémiyesi” yene amérikadiki Uyghur yash-ösmürlirining ana til we ma'arip terbiyesi hem yashlarning dangliq uniwérsitétlarda oqush yolidiki izdinishlirige yardem bérish, Uyghur tili we medeniyet tetqiqati bilen shughulliniwatqan tetqiqatchilar, mutexessisler bilen hemkarlishish qatarliq pa'aliyetlerdimu bolghan.

Doktor abliz abduqadir ependining bildürüshiche, kéyinki ikki yilda “Amérika Uyghur akadémiyesi” ning xizmitini téximu keng da'irilik mezmunlar bilen béyishtish pilanlan'ghan.

“Amérika Uyghur akadémiye” sining 3-nöwetlik saylam yighini heqqide igiligen uchurlardin melum bolushiche, bu qétimqi yighin'gha amérika Uyghur akadémiyesining bash meslihetchiliri, da'imiy hey'etliri, ezalar, bash akadémiyening re'isi, bash katipi we teptish mudiri qatarliqlar qatnashqan. Bu yighin'gha amérika Uyghur akadémiyesidin teptish doktor peyzulla zeydun ependi riyasetchilik qilghan. “Amérika Uyghur akadémiyesi” ning bash meslihetchiliridin doktor rishat abbas ependi we doktor erkin sidiq ependilermu yighinda söz qilip, “Amérika Uyghur akadémiye” sining xizmetlirige yuqiri baha bergen.

Uyghur akadémiyesini'ing re'isi, amérika Uyghur akadémiyesining bash meslihetchisi doktor rishat abbas ependi sözide “Uyghur akadémiyesi” ning 2009-yili qurulghandin buyanqi tereqqiyat ehwali heqqide mexsus toxtalghan. U, “Uyghur akadémiyesi” ning tereqqiy qilip kéngiyish tarixi heqqide toxtilip, nöwette uning 7 tarmaq teshkilat, ikki institut bir ana til kométitidin terkib tapqan, resmiy tizimgha élin'ghan teshkilatqa aylan'ghanliqini alahide tilgha élip ötken.

Ziyaritimizni qobul qilghan gülnar xanim amérika Uyghur akadémiyesining hey'et ezaliridin biri bolush bilen bille “Uyghur akadémiyesi” ning tetqiqat türliri mes'uli iken.

Gülnar xanim Uyghur “Uyghur akadémiyesi” ning omumiy qurulmisi we nöwettiki tereqqiyat ehwali heqqidiki so'allirimizgha jawab berdi. Uning bildürüshiche, “Amérika Uyghur akadémiyisi” nöwette payda-menpe'et almaydighan teshkilat süpitide resmiy tizimgha élin'ghan.

Uning bildürüshiche, 2009-yili türkiyede qurulghan “Uyghur akadémiyesi” ning nöwette, türkiye, yawropa, amérika, kanada, yaponiye, awstraliyede 7 tarmaq akadémiyesi qurulghan. Akadémiye terkibide yene “Qutatghubilik tetqiqat instituti”, “Xitay tetqiqat instituti” qatarliq ikki institut we “Uyghur ana til komitéti” bar bolup, nöwette “Uyghur akadémiyesi” ning herqaysi tarmaqliri öz alahidiliki boyiche, herqaysi döletlerde rolini jari qildurup kelmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet