Uyghur élide yer bulangchiliqi dawam qilmaqta, buninggha naraziliq bildürüshmu tosqunluqqa uchrimaqta

Washin'gtondin muxbirimiz shöhret hoshur teyyarlidi
2024.04.17
Yer-bulash-dehqan-qumul Qumulda yéri tartiwélin'ghan béliqiz xanim
Social Media

Uyghur rayonida dawam qiliwatqan axbarat cheklimiliri we jazalargha qarimay, Uyghur ijtima'iy axbarat wasitiliride Uyghur déhqanlirining peryadliri yenila dawam qilmaqta:

_ Bizge ige chiqidighan bir dölet yoqmu? ! bizni soraydighan bir hökümet yoqmu? ! …

Qumulning astane yézisidin ikenlikini bayan qilghan bu xanimning shikayetliridin melum bolushiche, mezkur yézidiki ahaliler da'irilerdin ruxset alghan halda teweliktiki bir boz yer parchisigha 3-4 yildin buyan ejir singdürgen we uni térilghu yerge aylandurghan. Emma bu yilgha kelgende, bu yerler ahalilerning qolidin tartiwélin'ghan we melum kishiler teripidin aghdurulup, buzghunchiliqqa uchrighan.

Téléfonimizni qobul qilghan astanidiki bir kent kadiri, peryad chékiwatqan xanimni tonumaydighanliqi we u inkas qilghan ehwaldinmu xewersizlikini éytti.

Ötken hepte torgha chiqqan bir xewerde ghulja nahiyesining baytoqay yézisidimu bir türküm yerlerning tartiwélin'ghanliqi pash qilin'ghan we éniqlashlirimizda, bu yerlerning xitay shirketlirige sétiwétilgenliki delillen'genidi.

 Qumuldin téléfonimizni qobul qilghan, emma özini ashkarilashni xalimighan bireylenning déyishiche, yéqinda qumulda “Qanunsiz échilghan yerlerni yighiwélish” nami astida déhqanlarning qolidiki bir qisim yerler tartiwélin'ghan. Bu yer tartiwélish dolqunida, nechche on ming mo yer achqan xitay köchmenlirige da'iriler chéqilmighan, peqet cheklik imkanliridin paydilinip birqanche modin yer achqan yerlik ahalilerning yerliri tartiwélin'ghan. Weziyettin xewerdar kishining yene eskertishiche, mezkur widiyoda shikayet qiliwatqan ayalning ismi béliqiz bolup, u bu widiyosida yalghuz öziningla emes, belki qumuldiki nechche yüzligen ahalining derdini bayan qilghan.

Béliqiz xanimning bu peryadliridin melum bolushiche, u, boz yerge singdürgen ter we xirajetlirini tilgha élip, kent mes'ulliridin yerni tartiwalmasliqni köp qétimlap telep qilghan.

 Kent mes'ulliri “Yer döletning” dégen bir éghiz jawab bilen uning we kenttiki bashqa déhqanlarning teleplirini ret qilghan.

 U ötken hepte özige tewe yerge kelginide, yerlirining bashqilar teripidin aghduruluwatqanliqini körüp axirqi chare süpitide, ehwalni doyin arqiliq jem'iyetke ashkarilighan.

 Igileshlirimizdin melum bolushiche, astane yézisi 3-kentning mes'uli, iskender isimlik kishi bolup, u so'allirimizgha jawaben, bu yerlerni bir terep qilishta özining qanundin chetnimgenlikini ilgiri sürdi. Emma u, yerlik ahalilerning yerliri tartiwélinip, xitay köchmenlirining yerliri tartiwélinmighanliqidek ré'alliqni inkar qilmidi. U bu heqte mexsus doklat arqiliq melumat bérishni xalaydighanliqini bildürüp, heqiqiy ehwalni tilgha élishtin özini qachurdi.

 Tordiki inkaslarda bayan qilinishiche, yer bulangchiliqi Uyghur élining herqaysi jaylirida yüz bériwatqan bolup, baytoqayning chighliq kentide yéri tartiwélin'ghan ahalilerning kent we yéza atlap alaqidar organlargha ehwalni inkas qilishimu tosqunluqqa uchrighan. Ghulja shehirining képekyüzi yézisidin yéri tartiwélin'ghanlar sheher we oblastqa qeder ehwalni inkas qilip baralighan bolsimu, ehwalgha sot we saqchi xadimliri ariliship, yerlik ahalilerni yerliridin waz kéchishke qistighan.

Hazirghiche igileshlirimizdin melum bolushiche, ghuljida bu yer bulangchiliqi “Yerlerni ixtisas igilirining qoligha merkezleshtürüsh” namida élip bérilghan bolsa, qumuldikisi “Qanunsiz échilghan yerlerni yighiwélish” namida élip bérilghan.

 A'ilidiki gholluq ezaliri lagér we türmilerge élip kétilgen yerlik ahaliler, addiy we axirqi tirikchilik wasitisi bolghan térilghu yerliridinmu ayrip qalghandin kéyin, hayat qélishning bir yoli süpitide béshigha kelgenlerni ijtima'iy axbaratqa ashkarilighan. Qumulluq béliqiz xanim bu heqtiki qararini widiyosida mundaq bayan qilidu:

 “Gépimizni anglaydighan orun tapalmidim, doyin'gha sözlep derdimni anglatmaqchimen…”

Yuqirida ghulja baytoqaydin bashqa, qumuldimu yerlik ahalilerning yerliri tartiwélin'ghanliqi we naraziliq bildürüshining tosqunluqqa uchrighanliqi heqqide melumat berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.