Бу йил уйғур елидә кәлкүн апәтлиридә өлгән адәмләр сани 20 гә йәтти

Уйғур ели мунасивәтлик даирилириниң кәлкүн апәтлири һәққидә бәргән әң йеңи истатестикилиридин мәлум болушичә уйғур елидә бу йил башлинип һазирға қәдәр кәлкүн апити сәвәблик өлгәнләр сани 20кишигә йәткән вә йәнә бир киши йоқап кәткән.

Болупму бу йил баһар башлиниши билән уйғур елиниң җәнуп шималида омумийүзлүк һөл йеғин характерлик кәлкүн, тағ серилиш вә қиян елиш апәтлири йүз берип кәлмәктә. Турпанға охшаш һөл йеғин әзәлдин аз көрүлидиған җайларму бу йил әллик йилдин буянқи әң еғир кәлкүн апитигә дуч кәлди.

Һазирғичә бу кәлкүн апәтлириниң зәрбисигә учриғанлар җәмий 250миңдин ашқан. 25Миңға йеқин өйләр өрүлгән. Кәлкүнниң деһқанчилиққа елип кәлгән бивастә зийини интайин еғир болуп җәмий 27миң гектар әтрапида терилғу йәрләр вәйран қилинған. Кәлкүн апәтлириниң қанчилик иқтисадий зиян кәлтүргәнлики һәққидә техи толуқ истатеска чиқирилмиди.

Бу йил -5айда уйғур елидики метрологийә идарилири бу йил -7 айдин -8 айғичә болған мәзгилдә уйғур елидә бултурқидинму еғир кәлкүн апәтлириниң йүз бериши мүмкинлики һәққидә алдин хәвәр елан қилған болсимму әмма мухбирлиримиз уйғур елидики кәлкүндин мудапиәлиниш тармақлиридин игилишидин ашкарики, мунасивәтлик даириләр йүз бериш еһтималллиқи болған кәлкүн апәтлиригә нисбәтән вақтида җидди тәдбир қолланмиған.

Кәлкүн апитигә учриған бәзи җайлардики амма "мунасивәтлик даириләр һаварайи өзгүриши яки кәлкүн апитидин алдин хәвәр бәргән болса апәтниң кәлтүрүп чиқиридиған зиянлириниму нисбәтән төвән чәккә чүшүрүшкә үлгәргән болатти" дәп инкас қилмақта. (Пәридә)