Ürümchide zor egeshme qatnash weqesini keltürüp chiqarghan jinayetchi sotlandi

Ürümchide buningdin besh ay ilgiri yeni 23 - iyun zor egeshme qatnash weqesi yüz bergen idi. Hemmini chöchütken bu weqede, dong féng markiliq bir chong yük aptomobil ürümchi say yoli yuqiri sür'etlik tash yolida melum qatnash weqesi üstide qutquzush élip bériwatqan doxtur aptomobili hemde saqchi mashinisini we yene weqege uchrighan yene bir aptomobilni shiddet bilen soqup besh kishining ölüshini hemde bir kishining éghir yarilnishini keltürüp chiqarghan hemde qéchip ketken.

Mezkur qatnash weqesining jawabkari 31 yashliq shén xongjé, eslide xénendin ürümchige ish izdep kelgen aqqun bolup, weqe yüz bérip ikki aydin kéyin tutulghan idi. Ürümchi qanun toridin ige bolishimizche 28 - noyabir küni shén üstidin sot échilip uning éghir qatnash weqesi keltürüp chiqarghanliqi hemde weqedin kéyin qéchip ketkenlikige qarita höküm élan qilin'ghan bolup, mezkur qatnash weqeside kélip chiqqan jem'iy ikki milyon 400 ming yu'en'ge yéqin ziyan hemde qanuniy jawabkarliqni öz üstige alghan.

Emma weqede hayatidin ayrilghanlarning a'ilisidikilerning ipadilishiche gerche shén jinayitige iqrar bolsimu, uning ölgüchilerning a'ile tawabatliri telep qilghan jem'iy ikki milyon yu'en tölemni töleshke qurbi yetmigenliki üchün hökümning ehmiyiti yoq iken.

Bu échinishliq egeshme qatnash weqeside ölgüchilerning arisida, exmetjan qasimining ayali mahinur qasimining jiyen qizi bolghan kömürkan doxturxanisining jiddiy qutquzghuchi séstrasi bolup xizmet qiliwatqan raziyemu bar idi. (Gülchéhre)