Хитай рамизан ейида уйғур елидики мусулманларға тәрәвини чәклигән

 Йәрлик даириләрниң куча вә қәшқәрдә йүз бәргән хитай бихәтәрлик күчлиригә һуҗум қилиш вәқәлиридин кейин, рамизан ейида йәрлик хәлқниң техиму зор көләмлик қаршилиқиға учраштин әнсирәп мусулманларниң тәрәви оқушини чәклигәнлики илгири сүрүлмәктә.

Уйғур елиниң тоқсу наһийисидә наһийилик һөкүмәт уқтуруш тарқитип, " диндарларни чоң көләмлик диний паалийәтләрни тәшкиллимәслик вә пиланлимаслиққа агаһландуруп турушимиз, иҗтимаий муқимлиққа зиян салидиған аммиви паалийәтләрниң алдини елишимиз керәк" дәп тәкитлигән.

Уқтурушта йәнә кадирлар, партийә әзалири, оқутқучилар вә оқуғучиларниң роза тутуши чәклинидиғанлиқини, кимдә ‏ - ким башқиларни роза тутушқа үндисә җазалинидиғанлиқини агаһландурған. Шаяр наһийилик һөкүмәт болса әрләрниң сақал - бурут қоюшни, аялларниң яғлиқ артишини чәклигән. Наһийилик һөкүмәтниң бу һәқтики уқтурушида " әгәр сақал - бурут қойғучилар вә яғлиқ артқучилар байқалса сақал ‏ - бурутини чүшүрүветиш, яғлиқини алдуруветишкә мәҗбурлаймиз " дейилгән.

 Кишилик һоқуқни көзитиш тәшкилатиниң хоңкоңдики тәтқиқатчиси фелим кайн, хитай даирилириниң рамизан ейида мусулманларға қаратқан юқириқи тәдбири " вәзийәтниң кишини қайғуға салидиған әһвалда икәнликини вә бастурушниң еғирлишиватқанлиқини көрситиду " дәп әскәртти.