Үрүмчи шәһиридә йүз бәргән ғәлитә қатнаш вәқәсидә дохтур вә сақчилар өлди

Уйғур аптоном райониниң мәркизи үрүмчидә җүмә күни арқа - арқидин ғәлитә қатнаш вәқәси йүз берип 7 адәм өлди. Өлгәнләр ичидә қатнаш вәқәси йүз бәргән җайға йетип барған вә вәқәни бир тәрәп қилмақчи болған 3 қутқузуш хадими билән 2 сақчи бар.

Шинхуа ахбарат агентлиқиниң хәвәр қилишичә, қатнаш вәқәси 23 - июн күни үрүмчи шәһириниң хетән тез сүрәтлик таш йолида йүз бәргән болуп, шу күни әтигән саәт 4: 00 ләрдә бир машина чоң йолни кесип өтүватқан 2 кишини урувәткән. Вәқәдин кейин сақчилар вә қутқузуш хадимлири нәқ мәйданға йетип келип яридарларни қутқузуватқанда йолдин өтүватқан йәнә бир машина сақчи вә қутқузуш хадимлирини соқивитип, 2 сақчи вә 3 нәпәр қутқузуш хадиминиң өлүшини кәлтүрүп чиқарған.

Шинхуа ахбарат агентлиқи бу һәқтики хәвиридә "юқири сүрәтлик бир йүк машиниси биринчи қетим йүз бәргән қатнаш вәқәсини бир тәрәп қиливатқан сақчи вә дохтурларни урувәтти " дәйду.

Биринчи қетим вәқә пәйда қилип 2 адәмниң өлүшини кәлтүрүп чиқарған шопур машиниси билән қечип кәткән. 2 - Қетим вәқә садир қилған машининиң шопури қолға елинди. Сақчилар қечип кәткән машининиң шопурини паш қилғучиларға 10 миң йүән мукапат беридиғанлиқини елан қилған. (Әркин)