Uyghur aptonom rayonida yüz bergen bir qatnash weqeside az dégende 20 adem öldi

Uyghur aptonom rayonining chingxey bilen chégrilinidighan altun tagh rayonida 23 - noyabir küni yüz bergen bir qatnash weqeside az dégende 20 adem öldi, 3 adem yarilandi. Xitay metbu'atliri ölgen kishilerning chingxeylik déhqanlar ikenlikini ilgiri sürmekte.

Jesetlerning altun tagh chégrisidiki chingxeyge tewe bir yézining meschitige qoyup qoyulghanliqigha qarighanda ölgen kishiler chingxeylik tungganlar bolushi mumkin.

Chaqiliq nahiyilik j x idarisining chimentagh shöbisidiki da'iriler, weqe 24 - noyabir küni tang seherde chaqiliq nahiyisining yétimbulaq yézisigha 300 kilométir kélidighan chimentaghdiki bir jilghida mashina örülüp kétip yüz bergenlikini bildürdi. Qazagha uchrighanlar gérmuluq puqralar bolup, weqe yüz bergende chimentaghdin gérmugha qaytiwatqan iken.

Chimentagh rayoni xitayning dölet derijilik teb'iy qoghdash rayoni, dep békitilgendin kéyin bu rayondiki Uyghur charwichilar chaqiliq nahiyisining bashqa jaylirigha yötkiwétilgen. Lékin bu rayon chingxeylik altun qazghuchilar we yawayi haywan owlighuchilarning makani bolup qalghan idi.

Xitay metbu'atliri qazagha uchrighuchilarning chimentagh rayonida nime ish qilip qaytqanliqini yazmidi. (Erkin)