Xitay da'iriliri peyziwattiki toqunushqa qatnashqan kishilerning a'ile tawabi'atlirini görüge tutqan

 Igilishimizge qarighanda saqchilar teripidin tutup qélin'ghan a'ile tawabi'atlirining ichide qizil boyi yézisidiki 2 saqchining öltürülgenlik weqesige qatnashqan, dégen guman bilen iz dériki qiliniwatqan 23 yashlardiki anargül isimlik yéza qizining 8 yashlardiki oghli we aman'gül isimlik anisi bar iken. Nöwette saqchilar qizil boyidiki weqege qatnashqanliqi ilgiri sürülgen az dégende 7 neper Uyghur yashning iz dérikini qilmaqta.

Bu yashlar misha yézisining puqraliri bolup, saqchilar ularning a'ile tawabi'atidiki mektep yéshida bolmighan a'ile ezalirini tutup turmaqta iken. Lékin görüge élish qachqunlarning a'ile tawabi'ati bilen cheklinidighan yaki xulum - xoshna, tonush bilishlerni öz ichige alidighan - almaydighanliqi melum emes. Qizil buyidiki weqe charshenbe küni yüz bergen idi.

Eyni chaghda qizil boyi saqchi ponkitidiki saqchilar mezkur yézidiki anargülni izdep kélip, qonaqliqtiki yashlar bilen uchriship qalghan. Yashlar saqchilarning 2 sini pichaq sélip öltürgen, az dégende 4 saqchini yarilandurghan, saqchilarning biri qéchip ketken idi.

Bu weqe 8 - ay kirgendin béri Uyghur qarshilashquchi küchlirining xitay bixeterlik küchlirige qarshi élip barghan 4 - qétimliq hujumi bolup hésablinidu. Uning üstige bu weqe xitay olimpik yighinidin kéyin rayonda sherqiy türkistan küchlirige qarshi keng - kölemlik tazilash herikiti bashlighan mezgilde yüz berdi.