Америка уйғурлири қурбан һейт вә йеңи йилни күтүвалди

Мусулманларниң муқәддәс қурбан һейтини америка пайтәхти вашингтон әтрапида яшайдиған уйғурларму хушал-хорамлиқ билән күтүвалди. Қурбан һейтиниң йеңи йил билән биргә келиши уйғурлар үчүн техиму хушаллиқ болди.

31- Декабир күни пайтәхт вашингтонниң йенидики Virginia шитатиниң Fairfax шәһиридә америка уйғурлири бирләшмиси вә уйғур җамаитиниң тәшкиллиши билән қурбан һейт вә йеңи йилни күтүвелиш паалийити өткүзүлгән болуп, буниңға Virginia, Maryland, Nuew York вә башқа шитатлардин кәлгән 200 дин артуқ уйғур вә уларниң достлири қатнашти.

Мурасимда уйғур миллий һәрикитиниң рәһбири рабийә қадир ханим нутуқ сөзләп, җамаәтниң қурбан һейтини вә йеңи йил байримини қизғин тәбриклиди шуниң билән бир вақитта йәнә гәрчә уйғурлар йеңи йилни тәбрикләватқан болсиму, лекин миңлиған уйғурларниң хитай түрмилиридә азап чекиватқанлиқини, уйғур тили вә мәдәнийитиниң йоқитилишқа дуч келиватқанлиқини әскәртти.

Рабийә қадир 2006-йилиниң уйғурлар үчүн хәлқара сәһнидә көрүнәрлик мувәппәқийәтләрни қолға кәлтүргән йил болғанлиқини тәкитләш билән биргә, көпчиликниң техиму иттипақлишип күрәш қилип, 2007-йилида йеңи нәтиҗиләрни қолға кәлтүрүшкә чақирди.Ахирида у вәтән ичи –сиртидики барлиқ уйғур қериндашлириға салам йоллайдиғанлиқини билдүрди. (Үмидвар)