Roshen abbas “Ayal qehrimanlarning ömürlük netije mukapati” gha érishken

“Uyghur herikiti” teshkilatining bashliqi roshen abbas nyu-york adwokatlar birleshmisi teripidin 2024-yilliq “Ayal qehrimanlarning ömürlük netije mukapati” (Her Hero Lifetime Achievement Award) gha érishken. Bu mukapat bu yilliq “8-Mart xelq'ara ayallar bayrimi” künide bérilgen.

Bu munasiwet bilen radiyomiz ziyaritini qobul qilghan roshen abbas xanim, bu sherepning eng aldi bilen Uyghur xelqige mensup ikenlikini bildürdi.

Roshen abbas xanim, “Bu mukapat dunyaning mustemlike astidiki sherqiy türkistan xelqi uchrawatqan irqiy qirghinchiliqni untup qalmighanliqining ipadisi” dédi.

Roshen abbas xanimning déyishiche, u 7-mart küni amérika pirézidénti jow baydénning “2023-Yilliq dölet ehwalidin doklat bérish yighini” gha teklip bilen qatnashqan.

7-Mart küni axshimi amérika dölet mejliside ötküzülgen yighinda, amérika pirézidénti jow baydén amérikaning ötken bir yilliq dölet ehwali heqqide mexsus nutuq sözligen. U sözide amérikaning ichki we tashqi siyasitige a'it mesililer heqqide toxtilip ötken. Jümlidin amérikaning dölet ichidiki siyasitide ayallar hoquqi, dölet ichide qoral-yaraghlarni kontrol qilish, köchmenler hoquqi, iqtisadiy tereqqiyat we ishqa orunlashturush qatarliq mesililerni tilgha élip ötken. U, amérikaning tashqi siyasiti heqqide qilghan sözide ukra'ina, pelestin mesililiridin bashqa yene xitay bilen bolghan istratégiyelik riqabet qatarliq témilardimu toxtalghan.

Roshen abbas xanimning bildürüshiche, yighin mezgilide uning bilen körüshken bir qisim dölet mejlisi ezaliri, xitay hökümranliqi astidiki Uyghurlar weziyiti we mejburiy emgek mehsulatlirigha a'it mesililer heqqide söhbette bolghan bolghan.

Mezkur söhbetning tepsilatini yuqiriqi awaz ulinishidin anglighaysiler.