B d t elchisi xitaydiki qiyin- qistaqqa élish ehwallirini tekshüridu

Birleshken döletler teshkilatining qiyin- qistaqqa élish ehwallirini tekshürgüchi xadimi manfred nowak düshenbe küni béyjinggha yitip kélip,xitaygha qilidighan ikki heptilik ziyaritini bashlidi. Bu xitayning tünji qétim b d t ning qiyin- qistaqqa élish ehwallirini tekshürgüchi xadimining ziyaritige ruxset qilishi bolup hésablinidu.

Amérika birleshme axbarat agéntliqining xewirige qarighanda, u bu qétimqi ziyaritide yene, Uyghur éli we tibetni ziyaret qilidu hemde bir tutup turush ornini közdin kechüridu.

Xelq'ara jem'iyet, xitay hökümitini saqchilarning jinayet gumandarlirini qiyin- qistaqqa élip, mejburiy iqrar qildurushigha yol qoyidu, ölüm jazasini qalaymiqan ishlitidu dep eyiblep kelmekte.

Xitay xelq qurultiyi gerche bu yil yazda saqchilarning qiyinap iqrar qildurushini chekleydighan bir qanunni maqullighan bolsimu, emma kishilik hoquq teshkilatliri xitayning qanun séstimisida qiyin- qistaq wastilirini keng qolliniwatqanliqini bildürmekte.

Xelq'ara kechürüm teshkilatining asiya ishlirigha mes'ol xadimi mark ellisin " qiyin- qistaqqa élish ehwali xitayda intayin omomyüzlük. Emma bizning igiligen melumatlirimizgha asaslan'ghinimizda Uyghur élide eng éghir we wehshiy qiyin - qistaqqa élish wastiliri qollinilidu" dep bildürdi. U xitayning b d t elchisining ziyaritige yol qoyush bilenla cheklenmey, xelq'ara teshkilatlarning chaqiriqigha qolaq sélishi kéreklikini körsetti. (Arzu)