Korladiki acha-singil mehkumlardin melikezat bilen patigülning sanji ayallar türmiside jaza mudditi ötewatqanliqi delillendi

Muxbirimiz shöhret hoshur
2022-01-20
Share
Korladiki acha-singil mehkumlardin melikezat bilen patigülning sanji ayallar türmiside jaza mudditi ötewatqanliqi delillendi Sanji ayallar türmisining 3 - we 6-etritide jaza mudditini ötewatqan acha-singil patigül memet(ongda) bilen melikizat memet.
Oqurmen teminligen

Korla sheherlik sot mehkimisining bir a'ilidiki 5 ayal üstidin chiqarghan hökümnamiside acha-singillardin melikezat memet, zahire memet we patigül memetlerning ayrim-ayrim halda 20 yil, 15 yil we 7 yilliqtin késilgenliki, a'ilidiki kélin bostan ibrahimning bolsa 19 yilliq késilgenliki qeyt qilin'ghan. Hökümnamide 78 yashliq xelchem pazilning késilgenliki tilgha élin'ghan bolsimu, emma uning jaza mudditi tilgha élinmighan we mehumlarning jaza mudditini qeyerde ötewatqanliqi melum emes idi. Muxbirimizning yenimu ilgirilep élip barghan téléfon ziyaretliri dawamida, bulardin melikezat memet bilen patgül memetning sanji ayallar türmiside jaza mudditini ötewatqanliqi türme xadimliri teripidin delillendi.

Hörmetlik radiyo anglighuchilar, mezkur hökümnamida 1984 ‏-yili tughulghan melikezat memetning atalmish “Milliy kemsitishke qutratquluq qilish”, “Topliship jem'iyet tertipini buzush” we “Qanat astigha élish” jinayetliri bilen jem'iy 20 yilliq késilgenliki؛ 1969‏-yili tughulghan patigül memetning atalmish “Topliship jem'iyet tertipini buzush” jinayiti bilen 7 yilliq késilgenliki qeyt qilin'ghan. Hökümnamide melikezatning atalmish jinayitige “Tebligh anglighanliqi” we “Tebligh üchün öy teminligenliki”, patigülningkige bolsa “Tebligh anglighanliqi” pakit qilin'ghan. Hökümnamide yene patigülning atalmish “Jinayitini baldur we toluq tapshurghanliqi” we “Jinayitige qattiq pushayman qilghanliqi” üchün yéniklitip jazalan'ghanliqi eskertilgen.

Hökümnamide yene melikezatning bir a'ile ayali ikenliki, patigülning bolsa korla sheher tékichi yéziliq mal doxturxanisining xadimi ikenliki tilgha élin'ghan. Shunga biz aldi bilen tékichi yéziliq saqchixanigha téléfon qilduq. Alaqidar xadimlar, patigül memet heqqide herqandaq bir melumat bérishni ret qildi.

Korla sheherlik teptish mehkisining eyipnamiside mezkur besh ayal topliship anglighan teblighdiki “Allahning barliqi we birliki, shundaqla namaz we hijaplinishning ehmiyiti” toghriliq mezmunning “Diniy esebiylik” ke yatidighanliqi, bundaq “Teblighqe sorun hazirlap bérish” ning “J x j jinayi ishlar qanuni” ning 290 ‏-we 249 ‏-maddisi boyiche “Milliy öchmenlikke qutratquluq qilish” we “Topliship jem'iyet tertipini buzush” jinayitini shekillendürüidighanliqi qeyt qilin'ghan. Bu eyibnamige pezilet memtimin isilik bir teptishning imzasi qoyulghan.

Korla teptish mehkimisimu mezkur teptish pezilet memtimin bilen körüshüsh telipimizni ret qildi. Emma xadimlarning ret jawapliri arsidin, korladin késilgen ayal mekumlarning az dégende bir qisimining sanjidiki bir türmide jaza mudditini ötewatqanliqi melum boldi. Buning bilen biz sanji ayallar türmisige téléfon qilduq. Alaqidar xadimlardin biri, mezkur besh ayalning türmening qaysi rayonlirida ikenliki heqqidiki so'alimizgha jawaben, ularning kimlik nomurlirini dep bérishimizni telep qildi. Mezkur xadim biz teminligen kimlik nomurigha asasen melikezat memetning 3-rayonda ikenlikini ashkarilidi. U yene arxiptiki melumatlargha asasen, melikizatning bu yil 37 yash ikenliki, jaza mudditining 20 yilliq késilgenlikini delillidi. U yene mehkum patigül memetning bu türmining 6-rayonida jaza mudditini ötewatqanliqini ashkarilash bilen birlikte, yéshining 52 yash ikenliki, jaza mudditining 7 yil ikenlikini delillidi.

Mezkur sot hökümi we teptish mehkimisining eyibnamisidin melum bolushiche, ulargha artilghan mezkur atalmish “Jinayet” 2013 yili, yeni mehkumlar tutqun qilinishtin 6 yil burun yüz bergen ishlar iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet