Xitay ottura asiya döletliri bilen tömür yol we tash yol yasash layihisi tüzdi

28‏- Awghust küni, ürümchide échiliwatqan ottura asiya rayoni iqtisadiy hemkarliq yighinining axirlishish künide, xitay we ottura asiya döletliri birlikte ottura asiyadin Uyghur élige tutishidighan tömür yol we tash yol yasash layihisini tüzüp chiqti.

Yighinda xitay, afghanistan, ezerbeyjan, qirghizistan, qazaqistan, mongghuliye, tajikistan we özbékistan qatarliq 8 dölet wekilliri béshkek-torghat-qeshqer yoli, düshenbe-tursunzade yoli qatarliq 3 chong rayonluq tash yol yasash pilanini otturigha qoyghan.

Xitay xewer agéntliqining melum qilishiche, yighinda wekiller yene, xitay-qirghizistan-özbékistan tömür yol türining mumkinchilik tetqiqatini bu döletlerning meblegh sélish pilanigha kirgüzüsh teklipini körsetken. Ular yene bu döletler arisidiki chégradin kirish kélishimlirige bir yürüsh tüzitishlerni kirgüzgen.

Ottura asiyaning stratégiyilik ehmiyiti barghanséri xelq'ara jem'iyetning diqqitini tartiwatqan bolup, xitay bu döletler bilen bolghan her sahediki alaqigha alahide ehmiyet bermekte. Xitayning bu ottura asiya döletliri bilen bolghan hemkarliqi soda we transport hemkarliqliridin tartip, énérgiye we su menbeliridin paydilinishqiche kéngeygen. (Peride)