Yaponiyede hökümet orunlirining qollishi bilen Uyghur qirghinchiliqini tonushturush pa'aliyiti ötküzüldi

Yaponiye Uyghur jem'iyiti Uyghur irqiy qirghinchiliqi we Uyghurlarning eng yéngi weziyitini yaponiyediki her qaysi sheherlerde oxshimighan shekillerde anglitishni dawamlashturmaqta.

Igilishimizche, 1-ayning 27-künidin 28-künigiche yaponiye miye nahiyesining yiga shehiride Uyghur qirghinchiliqi toghrisida doklat bérish yighini, kochida nutuq sözlesh we waraqche tarqitish pa'aliyiti ötküzülgen. Mezkur pa'aliyet yiga sheherlik hökümetning qollishi bilen sheherlik hökümetning zalida ötküzülgen. Yighin'gha yaponiye Uyghur jem'iyitining mes'ulliridin bashqa, yiga sheherlik hökümetning xadimliri we xelq ammisidin bolup köp sanda kishi qatniship, Uyghurlarni qollaydighanliqini bildürgen.

RFA/Erkin Tarim

Bu pa'aliyetni uyushturghan yaponiye Uyghur jem'iyitining idare hey'et ezasi we dunya Uyghur qurultiyining sherqiy jenubiy asiya döletliridiki xizmetlirige mes'ul wekili sawutjan memet ependi téléfon ziyaritimizni qobul qildi. U, aldi bilen 1-ayning 27-künidiki pa'aliyetning mezmuni heqqide melumat bérip mundaq dédi: “Bu yighinda men Uyghurlarning hazirqi omumiy weziyiti we taylandta qamilip turghan 48 neper Uyghurning ehwali toghrisida tepsiliy melumat berdim. Doklatni anglighanlar buninggha qiziqip: ‛xitayning chégra halqighan basturushi küchiyiwatqan bügünki künde silerning yaponiyediki hayatinglar bixetermu? bundin kéyin silerge qandaq yardem bersek bolidu?‚ dégen so'allarni soridi”.

Yaponiye Uyghur jem'iyiti nurghun pa'aliyetler ötküzgende, parlamént ezaliri we ammiwi teshkilatlar qollighan bolsimu, lékin köpinchisini hökümet orunliri biwasite qollap baqmighan iken. Bu qétimqisi Uyghurlarning yaponiyediki hökümet da'iriliri qollighan üchinchi pa'aliyiti bolup hésablinidiken. Sawut memet ependining bildürüshiche, bu ehwal yaponiyede Uyghur dewasining barghanche hökümet orunlirining qollishigha érishiwatqanliqini körsitidiken.

RFA/Erkin Tarim

Yaponiye Uyghur jem'iyitining re'isi exmet létip ependi, yaponiyede üch yildin buyan dawamlashturup kelgen muhim pa'aliyitini tilgha élip mundaq dédi: “Yaponiyede üch yildin buyan üzüldürmey élip bériwatqan bir pa'aliyitimiz bar. Bu bolsimu yaponiyediki pütün sheher we yézilarni aylinip yürüp Uyghur irqiy qirghinchiliqi toghrisida guwahliq bérish yighinliri uyushturush, körgezme échish, höjjetlik filimlarni qoyush we kochilarda teshwiqat waraqchiliri tarqitishtur”.

Exmet létip ependi, yaponiye Uyghur jem'iyitining 2024-yil ichide yaponiyening 9 shehiride bu xil pa'aliyetlerni ötküzgenlikini, 2025-yildiki tunji pa'aliyetni 27- we 28-yanwar künliri yaponiye miye nahiyesining yiga shehiride ötküzgenlikini bayan qildi.

2022-Yil 11-ayning 16-, 17-künliri yaponiye chiba sheherlik hökümet we ma'arip idarisining qollishi bilen Uyghur medeniyiti we Uyghur élining hazirqi éghir weziyiti tonushturulghan körgezme ötküzülgen bolup, bu yaponiyediki hökümet orunlirining qollishi bilen ötküzülgen tunji pa'aliyet hésablinidiken.