Yawropa putbol musabiqisi meydanida namayan bolghan ay-yultuzluq kök bayraq heqqide tesiratlar

Uyghur qizi adile “Yawropa longqisi” putbol musabiqisining türkiye bilen chéxiye musabiqisi meydanigha sherqiy türkistanning ay-yultuzluq kök bayriqini élip kiriwatqan körünüsh. 2024-Yili 26-iyun, hamburg, gérmaniye.

“Yawropa longqisi” putbol musabiqisi meydanida közge chéliqqan sherqiy türkistanning ay-yultuzluq kök bayriqi toghrisidiki hayajanliq bayanlar birqanche kündin buyan ijtima'iy taratqularni qaplidi. Uyghur jama'iti, bu jasaretni körsiteligen Uyghur yashlirigha yuqiri bahalar bériship, buni “Sherqiy türkistan xelqining milliy iradisining menggü ölmeydighanliqining bir namayendisi” dégendek ibariler bilen teripleshti.

Gérmaniyening hamburg shehiride 26-iyun ötküzülgen türkiye bilen chéxiyening musabiqiside kök bayraqning siymasini qanche milyonlighan tamashibinlarning köz aldida namayan qilghan qizning ismi adile, uning yoldishining ismi bilge xaqan idi. Bügün bizning muhajirettiki Uyghurlarni hayajan'gha salghan bu hadise heqqide adile we uning a'ilisi hemde yawropadiki bezi Uyghurlar bilen söhbet ötküzüsh pursitimiz boldi.

RFA/Ekrem

Wetenperwerliki we milliy jasariti bilen yillardin buyan élip barghan xitay zulmigha qarshi pa'aliyetliri arqiliq gérmaniyediki Uyghur jama'itining hörmitige muyesser bolup kéliwatqan Uyghur qizi adile “Yawropa longqisi” putbol musabiqisi meydanigha sherqiy türkistanning ay-yultuzluq kök bayriqini élip kirishtiki meqsiti heqqide toxtalghanda, bu bayraqning sherqiy türkistan döliti we xelqining iradisining simwoli ikenlikini eskertip, “Uyghurlarning awazining öchmigenlikini xitay dölitige körsitip qoyushning bu pursitini qoldin bermiduq” dégenlerni tilgha aldi.

Adilening dadisi enwer ehmet ependim bu heqte toxtalghanda, qizining jasaritidin köp pexirlen'genlikini bayan qilip, Uyghur perzentlirini Uyghur kimliki we weten söygüsi bilen yétishtürüshning a'ile terbiyeside intayin muhimliqini tekitlep ötti. Adilening anisi aman'gülmu bu hayajanliq körünüshni peyda qilalighan qizidin iptixarlan'ghanliqini ipade qildi. Uning éytishiche, adilening ay yultuzluq kök bayraqqa nisbeten söygüsi alahide küchlük bolup, hetta toyidimu bu bayraqni ésishta ching turuwalghan we toy zalining sehnisige ay-yultuzluq kök bayraqni toy axirlashquche ésip qoyghan.

RFA/Ekrem

Ay-yultuzluq kök bayraqning dunyaning her yéridiki qanche yüz milyonlighan adem neq meydandin köridighan “Yawropa longqisi” putbol musabiqisi meydanida jewlan qilin'ghanliqidin hayajanlan'ghan “Gérmaniye Uyghur medeniyet we ma'arip birliki” teshkilatining re'isi peride xanim 27-iyun adilening apisi aman'gülge yollighan uchurida, bu körünüshtin közlirige yash alghanliqini eskertip “Bu, kelgüsi ewladlirimizning wetinimiz sherqiy türkistanning haman birküni musteqil bolidighanliqigha qarita ishenchining bir namayendisi” dégen.

Gérmaniyediki weziyet analizchisi gheyur qurban ependi adile we uning yoldishi bilge xaqanning yawropa longqisi putbol musabiqisi meydanida sherqiy türkistanning ay-yultuzluq kök bayriqini jewlan qildurghanliqigha yuqiri baha berdi. Norwégiyediki Uyghur siyasiy aktipliridin ihsan shükranmu bu heqte öz tesiratlirini bayan qilip ötti.

RFA/Ekrem

Melum bolghinidek, “Yawropa longqisi” putbol musabiqisi 2024-yili 14-iyun gérmaniyening myunxén shehride bashlan'ghan bolup, bu musabiqe 14-iyulgha qeder dawam qilidiken. Mezkur musabiqe munasiwiti bilen dunyaning herqaysi elliridin kelgen milyonlighan top mestaniliri nöwette gérmaniyening oxshash bolmighan sheherliride qaynam tashqinliq bir menzire peyda qilmaqta. Eslide, Uyghur mejburiy emgiki bilen eyiblinip kéliwatqan xitayning “Hisense”, “Huawei”, “BYD” qatarliq shirketliri pursettin paydilinip musabiqe meydanlirida élan bérip, özlirini bazargha salmaqta. Uyghurlarning qarishiche, mushundaq weziyette, irqiy qirghinchiliqqa uchrawatqan Uyghurlarning tarixiy wetini sherqiy türkistanning ay-yultuzluq kök bayriqining namayan qilinishi hayajanliq bir hadise bolup hésablinidiken.