“5-июл үрүмчи қирғинчилиқи” ниң 15 йиллиқи мунасивити билән явропа әллиридә намайишлар елип берилди

5-6-Июл күнлири “5-июл үрүмчи қирғинчилиқи” ниң 15 йиллиқини хатириләш мунасивити билән дуняниң һәрқайси җайлирида һәр хил көләмдә намайишлар өткүзүлди. Биз өрнәк сүпитидә, явропадики 4 шәһәрдә өткүзүлгән намайишлар тоғрисида мәлуматлар беришни лайиқ көрдуқ.

5-Июл күни германийәниң карлсрухе шәһиридиму көплигән кишилик һоқуқ тәшкилатлириниң һәмкарлишиши, йәрлик герман аһалисиниң иштиракида намайиш елип берилған. Карлсрухедики уйғур зиялийси әнвәр әһмәтниң билдүрүшичә, бу намайишқа уйғурлардин көпрәк германлар қатнашқан болуп, карлсрухедики университетниң икки нәпәр пирофессори “‛шәрқий түркистанға азатлиқ‚ дегән лозункини биз көтүрәйли” дейишип, өзлириниң уйғурларға вә уларниң келәчәктики дөлитигә болған һесдашлиқлирини намаян қилишқан.

5-Июл күни норвегийәниң пайтәхти осло шәһиридики парламент бинаси алдидиму намайиш өткүзүлгән. Норвегийә уйғур комитетиниң рәиси хәлчәм мәмтимин ханимниң билдүрүшичә, “5-июл үрүмчи қирғинчилиқи” ни хатириләш намайиши ослодиму қизғин кәйпият ичидә давам қилған.

6-Июл күни явропа иттипақиниң мәркизи болған белгийә пайтәхти бирюсселдиму намайиш елип берилған. Белгийә уйғур җәмийитиниң рәиси әкбәрҗанниң билдүрүшичә, шәһәрниң қайнақ сода мәркизидә өткүзүлгән бу намайиш йәрлик аһалиләрниң күчлүк диққитини җәлп қилған.

6-Июл күни йәнә голландийәниң амстердам шәһиридики дам мәйданидиму кәң көләмлик намайиш елип берилған. Намайиш мәйданидин зияритимизни қобул қилған лагер шаһити қәлбинур сидиқ ханимниң билдүрүшичә, бу намайишқа хоңкоңлуқлар вә ички моңғулийәликләрму иштирак қилған.

5-6-Июл күнлири йәнә явропаниң башқа дөләтлиридики уйғурлар мәркәзлишип олтурақлашқан шәһәрләрдиму мәхсус намайишлар елип берилған.