Yawropa parlaménti mejburiy emgek mehsulatlirini yawropagha import qilishni cheklesh qarari maqullighan

Yawropa parlaménti 9-iyun küni yuqiri awaz bilen qarar maqullap, xitayning Uyghur rayonida yürgüzüp kelgen qebih jinayetlirini “Insaniyetke qarshi jinayet” we “Éghir irqiy qirghinchiliq xewpi” shekillendürgen jinayet dep étirap qilish bilen birge, Uyghur rayonidiki mejburiy emgekke chétishliq mehsulatlarni yawropa bazirigha import qilishni chekleydighan muhim bir qararni maqullighan.

Dunya Uyghur qurultiyining tor bétide élan qilin'ghan axbaratta bildürülüshiche, yawropa ittipaqi maqullighan bu qarar xitayning mejburiy emgek mehsulatlirini chekleshning ünümlük qorali hésablinidiken. Bu qarar yawropa komissiyonigha mejburiy emgekni cheklesh toghruluq küchlük tekliplerni bergen. Yawropa komissiyoni bu yil 9-ayda mejburiy emgek mehsulatlirini yawropa bazirigha import qilishni chekleydighan tedbirlerni otturigha qoyidiken.

Dunya Uyghur qurultiyining re'isi dolqun eysa ependining bildürüshiche, yawropa parlaménti maqullighan bir qarar xitayning mejburiy emgek mehsulatlirini yawropada sétishni cheklesh soda qollanmisi heqqidiki qarar iken.

Yawropa parlaméntining mejburiy emgek mehsulatlirini cheklesh qarari bilen amérika dölet mejliside maqullan'ghan we bu yil 6-ayning 21-künidin bashlap ijra qilinidighan “Uyghur mejburiy emgikining aldini élish qanuni” her ikki tereptin xitayning iqtisadigha zerbe bérishte chong rol oynaydiken. Dolqun eysa ependining qarishiche, xitay emdi amérika bilen yawropani bir-birige qarshi qoyush, ulardin ayrim-ayrim paydilinish oyunini oyniyalmaydiken.

Yawropa parlaménti maqullighan bu qarar démokratik ellerning kishilik qimmet qarishini, zamaniwi qulluqni yoqitish iradisini eks ettüridighan qarar bolup, xitayning iqtisadi küchini ajizlitish arqiliq uning zorawanliq qilmishigha xatime bérish texirsiz mesilige aylan'ghan.

Dolqun eysa ependi yawropa parlaménti maqullighan bu qararning peqet mejburiy emgek mehsulatlirini import qilishni chekleshla emes, belki uninggha yandash mulazimetlerni chekleshnimu öz ichige alidighanliqini, bu nuqtidin éytqanda, bu qararning irqiy qirghinchiliqni toxtitish jehette ehmiyetlik bir qarar bolghanliqini bayan qildi.

Uyghurlargha irqiy qirghinchiliq yürgüzüwatqan xitayni toxtitishning birdinbir amali uning iqtisadini weyran qilishmu? siyasiy közetchi ilshat hesen ependi, iqtisad bilen xitayning gélini boghush arqiliq uni peylidin yandurghili bolmaydighanliqini, iqtisadiy jaza bilenla irqiy qirghinchiliqni toxtatqili bolmaydighanliqini misallar bilen chüshendürdi. Uning bildürüshiche, ikkinchi dunya urushi mezgilidiki gétlir gérmaniyesi we bügünki bérmagha xelq'aradin iqtisadiy cheklime qoyulghan bolsimu, ular irqiy qirghinchiliqni dawamlashturiwergen. Xitayning irqiy qirghinchiliq jinayitini toxtitish üchün uninggha omumyüzlük jaza yürgüzüsh, hetta bu mustebit, rezil hakimiyetni aghduruwétish kérek iken.